ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴼ ⵓⵖⴰⵡⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⵏ 2030
ⵜⴷⵔⵓ ⵜⵎⴰⵔⵉⵜⴰ ⵎⴰⵙⵙⴰ ⵉⵍⵀⴰⵎ ⵙⵙⴰⵇⵉ, ⵜⴰⴳⵎⴰⵎⵜ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⴷ ⵎⴰⵙⵙ ⵎⵓⵃⴰⵎⵎⴰⴷ ⵛⵓⴽⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ , ⴰⵢⵏⴰⵙ 13 ⴷⵓⵊⴰⵏⴱⵉⵔ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴼ ⵓⵖⴰⵡⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⵏ 2030, ⵅⴼ: ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴷ ⵓⵖⵓⵍ ⵏ ⵓⵚⴽⵓ ⵉⵥⵉⵍⵏ ⵉ ⴽⵓⵢⴰⵏ, ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵚ.
ⵜⵏⵏⴰ ⵜⵎⴰⵔⵉⵜ ⴳ ⵜⴳⵓⵔⵉ ⵏⵏⵙ ⵉⵍⵍⴰⵏ ⴳ ⵜⵖⵉⵎⵉⵜ ⵜⵉⵙ ⵙⵏⴰⵜ ⴼ ⵜⵎⵔⴰⵔⵓⵜ ⵉ ⵜⴰⵙⵙⴰⵙⵜ ⵏ ⴽⵓⴼⵉⴷ 19: ⵜⵉⵍⴰⵍ ⵏ ⵉⴱⵕⵍⴰⵎⴰⵏⵏ ⴳ ⵜⴳⵏⵙⴰⵙⵜ ⴷ ⵓⵙⵔⵓⵙ ⵏ ⵉⵙⵍⴳⵏⵏ, ⵉⵙⵏⴼⵍⵏ ⵏ ⵜⵎⵙⵓⵜⵍⵜ ⴰⴷ ⵍⵍⵉ ⵓⵊⵊⴰⵏⵉⵏ ⵜⵉⵏⴱⴰⴹⵉⵏ ⴰⴷ ⵙⴽⵔⵏⵜ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵉ ⵓⴼⵔⴰⴳ ⵏ ⵜⴷⵓⵙⵉ ⵜⴰⵎⴰⵜⴰⵢⵜ ⵙ ⵉⵣⵣⵔⴰⴼⵏ ⴷ ⵜⵙⵔⵜⴰⵢ ⴷ ⵉⵖⴰⵡⴰⵙⵏ.
ⵜⵉⵏⵉ ⵎⴰⵙ ⵜⴳⴰ ⵜⵣⵣⵉⴳⵣⵜ ⵏ ⴽⵓⵕⵓⵏⴰ ⵢⴰⵏ ⵓⵏⴰⵥⴰⵕ ⴰⵏⴰⵎⵓⵔ ⴰⵎⴳⵔⵓ, ⵉⵡⵙⵏⵜ ⴽⵓ ⵜⵓⴳⴳⴰⵙ ⵉ ⵓⵙⴱⴷⴷⵉ ⵏⵏⵙ, ⵢⴰⵡⵙ ⵓⵙⵎⴰⵇⵇⵍ ⴰⵎⵣⵡⴰⵔⵓ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵙ ⵓⵙⴽⵔ ⵏ ⵓⴼⵏⵉⵇ ⵉⵥⵍⵉⵏ ⴷ ⵉⵙⵡⵓⴷⴷⵓⵜⵏ ⴱⴷⴷⵏⵉⵏ ⴼ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ, ⴰⵢⵍⵍⵉ ⵢⵉⵡⵙⵏ ⴳ ⵜⵡⵓⵔⵉ ⵏ ⵓⴱⵕⵍⴰⵎⴰⵏ ⴷ ⵜⵏⴱⴰⴹⵜ, ⴷ ⵓⵙⴽⵔ ⵏ ⵜⵎⵢⴰⴷⴰⵙⵜ ⵉⵙⵎⵓⵏⵏ ⵜⵓⴳⴳⴰⵙ ⵏ ⵜⵏⴱⴰⴹ ⴷ ⵜⵎⵔⵙⴰⵍ ⴷ ⵉⵎⵙⴽⴰⵔⵏ.
ⵜⵙⴰⵡⵍ ⵜⵎⴰⵔⵉⵜ ⴼ ⵜⵎⵙⴽⴰⵔ ⵜⵉⴷⵙⵜⴰⵔⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵣⵣⵔⴰⴼ ⴷ ⵜⵉⴹⴰⴼ, ⴷ ⵓⵏⵏⵓⵕⵥⵎ ⵏⵏⵙ ⴼ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵢⵉⵏ. ⵉⵍⵍⴰ ⵓⵙⵖⵣⵏ ⵏ ⵉⵙⵍⴳⵏⵏ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ, ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ...ⵜⵍⵍⴰ ⵓⵍⴰ ⵜⵡⵡⵓⵔⵉ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵙ ⵜⵓⴷⴷⵉⵔⵜ ⵜⴰⵅⴰⵜⴰⵔⵜ.
ⵜⵉⵏⵉ ⵜⵎⴰⵔⵉⵜ ⵎⴰⵙ ⵙⴽⵔⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵜⵉⵙⵎⵉⴳⴰⵍ ⵏⵏⵙⵏⵜ ⵜⵉⴷⵙⵜⴰⵔⵉⵏ ⴳ ⵓⵣⵣⵔⴰⴼ ⴷ ⵜⵉⴹⴰⴼ ⵎⵇⵇⴰⵔ ⵍⵍⴰⵏⵜ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵙⵉⵣⴷⵉⵔⵏⵉⵏ ⵜⵉⵍⵉⵜ ⴳ ⵜⵙⵎⵓⵏⴰⵢ, ⵙ ⴰⵢⵍⵍⵉ ⴷ ⵉⵡⵉⵏⵜ ⵜⵎⵙⵓⵜⵍⵉⵏ ⵥⵍⵉⵏⵉⵏ ⴷ ⵎⴰⴷ ⵉⵍⵍⴰⵏ ⴳ ⵉⴱⵕⵍⴰⵎⴰⵏⵏ ⵢⴰⴹⵏⵉⵏ.
ⴳ ⵜⴳⵉⵔⴰ, ⵜⵖⵔⴰ ⵎⴰⵙⵙⴰ ⵉⵍⵀⴰⵎ ⵙⵙⴰⵇⵉ ⵉ ⵓⵙⵎⵓⵙⵙⵓ ⴷ ⵓⵎⵢⴰⵡⴰⵙ ⵉⵛⵛⴰⵔⵏ, ⵃⵎⴰ ⴰⴷ ⵜⵉⵍⵉ ⵜⵡⵡⵓⵔⵉ ⵉ ⵡⴰⵎⵓⵏ ⴷ ⵜⵎⵙⴰⵔⵉⵏ ⵏⵏⵙ ⴳ ⴽⵓ ⵉⴳⵔⴰⵏ, ⵙⵡⵓⵔⵉⵏ ⵉⴱⵕⵍⴰⵎⴰⵏⵏ ⴳ ⵓⵣⵣⴳⵉⵔ ⵏ ⵉⵡⵜⵜⴰⵙⵏ ⵏ ⵓⵖⴰⵡⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⵙ ⴰⵢⵍⵍⵉ ⴷ ⵉⵡⵉⵏⵜ ⵜⵎⵙⵓⵜⵍⵉⵏ ⵍⵍⵉ ⵏⵏ ⵓⵔ ⵏⵜⴰⵎ.
ⵉⵙⵎⵏⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵛⵓⴽⵉ ⵜⴰⴳⵓⵔⵉ ⵏⵏⵙ ⴳ ⵜⵖⵉⵎⵉⵜ ⵜⵉⵙ ⴽⵕⴰⴹⵜ ⴼ: ⵜⴰⵎⵔⴰⵔⵓⵜ ⵉ ⵜⴰⵙⵙⴰⵙⵜ ⵏ ⴽⵓⴼⵉⴷ 19: ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴳ ⵜⵎⵙⴰⵙⵜⵍⵜ ⵜⴰⵎⴰⵜⴰⵢⵜ ⴷ ⵜⵉⴹⴰⴼ, ⵉⵙⴰⵡⵍ ⴼ ⵜⵉⵍⴰⵍⵜ ⵏ ⵓⵙⵇⵇⵉⵎ ⴳ ⵓⵣⵎⵣ ⵏ ⵓⴱⴰⵢⵢⵓⵕ, ⵢⵉⵏⵉ ⵎⴰⵙ ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵍⴳⵏⵏ ⵏ ⵓⵥⵕⴼ ⵙ ⵎⴰⴷ ⴷ ⵉⵡⵉⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵙⴽⵔ ⴳ ⵜⵎⵣⵡⴰⵔ ⵏⵏⵙ ⴰⴷ ⵉⵔⴰⵔ ⵉ ⵉⵙⵉⴳⴳⵉⵍⵏ ⵏ ⵉⵏⵎⵓⵔⴰⵏ ⴷ ⵓⵙⴽⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ.
ⵉⵙⴰⵡⵍ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴼ ⵜⵓⴳⴳⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⴽⵔ ⵏ ⵉⵖⴰⵡⴰⵙⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴳ ⵓⵣⵎⵣ ⵏ ⴽⵓⴼⵉⴷ 19. ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⵓⵙⵏⴼⴰⵍⵏ ⴳ 2021, ⴳ ⵍⵍⴰⵏ ⵉⵙⵡⵓⴷⴷⵓⵜⵏ ⵏ ⵓⵙⴷⴱⴱⵉ ⵏ ⵓⴱⴰⵢⵢⵓⵕ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⴳ ⵓⴷⵡⴰⵙ ⴷ ⵓⴼⵔⴰⴳ ⴰⵏⴰⵎⵓⵏ ⴷ ⵓⵙⵙⵍⵎⴷ.
ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ, ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵣⵣⵔⴰⴼⵏ ⵉⵏⴰⵎⵓⵏⵏ ⴳ ⵍⵍⴰⵏ ⵡⵉⵏ ⵉⵎⵙⵡⵓⵔⵉⵢⵏ ⵉⵎⵍⵜⴰⵖⵏ ⴳ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⵜⵜⵓⴹⵕⵕⴰⵏⵏⵉⵏ, ⴰⵙⵖⵣⵏ ⵏ ⵓⵙⵍⴳⵏ ⴰⵙⴰⵜⵉ ⴼ ⵓⴼⵔⴰⴳ ⴰⵏⴰⵎⵓⵏ, ⵍⵍⵉ ⵉⴽⵛⵎⵏ ⴳ ⵢⴰⵏ ⵓⵙⵏⴼⴰⵔ ⴰⵏⴰⵎⵓⵏ ⴼ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵏ 9 ⴽⵟⵓⴱⵕ 2020.
ⵙⴽⵔⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵜⵉⵙⵎⵓⵏⵉ ⴰⴽⴷ ⵉⵎⵙⵜⴳⴳⴰⵔⵏ ⵓⵏⴱⵉⴹⵏ ⴼ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19. ⴰⵢⵍⵍⵉ ⵢⵉⵡⵙⵏ ⴳ ⵓⵣⵣⴳⵉⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ. ⵢⵉⵍⵉ ⵓⵍⴰ ⵓⵙⵎⵖⵔ ⵏ ⵜⵎⵙⴰⵙⵜⵍⵉⵜⵏ ⵏ ⵉⴳⵔⴰⵏ ⵉⵏⴰⵎⵓⵏⵏ ⴰⵎ ⵜⴰⴷⵓⵙⵉ ⴷ ⵓⵙⵙⵍⵎⴷ ⴷ ⵓⵙⵡⵓⵔⵉ.
ⵉⵜⵜⵓⵙⵏⵎⴰⵍⴰ ⵓⵏⵎⵓⵇⵇⴰⵔ ⴰⴱⵕⵍⴰⵎⵏⵉ ⴼ ⵓⵖⴰⵡⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⵏ 2030 ⵙⴳ ⵜⵙⵇⵇⵉⵎⵜ ⵏ ⵜⵎⵜⵜⴰ ⵎⵓⵏⵏⵉⵏ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵏ ⴳⵔⵡ ⵏ ⴰⵙⵢⴰ, ⴰⵖⴰⵡⴰⵙ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵜⴳⵎⵉ, ⵜⴰⵔⴱⴱⵓⵜ ⵏ ⵓⴱⴰⵏⴽ ⵓⵙⵍⵉⵎ ⵉ ⵜⴳⵎⵉ ⵙ ⵜⵡⵉⵙⵉ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ. ⵉⵡⴰⵜⵜⵙ ⴰⴷ ⵢⵉⵍⵉ ⵓⵎⴹⴰⴽⴰⵕ ⴷ ⵓⵙⵏⴼⵍ ⵏ ⵜⵉⵔⵎⵉⵜⵏ ⵊⴰⵔ ⵉⴱⵕⵍⴰⵎⴰⵏⵏ ⴷ ⵡⵉⴷⴰ ⵜⵀⵎⵎⴰ ⵜⴳⵎⵉ ⵜⴰⵙⵓⵍⴰⵏⵜ. ⵉⴼⴼⵖ ⵓⵏⵎⵓⵇⵇⴰⵔ ⵙ ⵜⴱⵔⴰⵜⵉⵏ ⵉ ⵓⵏⵎⵓⵇⵇⴰⵔ ⴰⵄⵕⴰⴱ ⵉ ⵜⴳⵎⵉ ⵜⴰⵙⵓⵍⴰⵏⵜ ⵏ 2022.