ⴰⵏⵎⵓⵇⵇⴰⵔ ⴼ “ⵜⴳⵯⵏⵙⴰⵙⵜ ⵏ ⵜⵎⵖⴰⵔⵉⵏ ⴳ ⵉⴱⵕⵍⴰⵎⴰⵏⵏ” ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ

ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 27 ⵛⵓⵜⴰⵏⴱⵉⵔ 2022 ⴷ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ, ⴰⵏⵎⵓⵇⵇⴰⵔ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴼ; ⵜⴳⵏⵙⴰⵙⵜ ⵏ ⵜⵎⵖⴰⵔⵉⵏ ⴳ ⵉⴱⵕⵍⴰⵎⴰⵏⵏ:ⵜⵉⵎⵙⴽⴰⵔ ⴷ ⵉⵎⵏⴰⴷⵏ, ⵍⵍⵉ ⵜⵙⵙⵉⵅⴼ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ, ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ, ⴷ ⵜⵉⵍⵉⵜ ⵏ ⵎⴰⵙⵙⴰ ⵏⵉⵍ ⵙⵜⵉⵡⴰⵔⵜ ⵜⴰⵎⵙⵇⵇⴰⴷⵜ ⵏ ⴽⴰⵏⴰⴹⴰ ⴳ ⵕⵕⴱⴰⵟ, ⴷ ⵉⵎⵓⵣⴰⵢⵏ ⵙⴳ ⵍⵎⵖⵔⵉⴱ ⴷ ⴱⵕⵕⴰ ⵏⵏⵙ, ⴷ ⵜⵉⵍⵉⵜ ⵏ ⴽⵉⴳⴰⵏ ⵏ ⵜⴱⴰⵕⵍⴰⵎⴰⵏⵉⵢⵉⵏ.

ⴳ ⵜⵣⵡⵉⵔⵉ, ⵜⵙⴰⵡⵍ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ ⴼ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴳ ⵓⵙⵡⵉⵔ ⴰⵙⵔⵜⴰⵏ ⴷ ⵓⴱⵕⵍⴰⵎⴰⵏⵉ, ⵜⵉⵏⵉ ⵎⴰⵙ ⵉⵍⵍⴰ ⵙ ⵜⵏⴳⴰⴷⴷⴰⵢⵜ ⴰⴽⴷ ⵉⵔⴳⴰⵣⵏ, ⴰⵢⵍⵍⵉ ⵔⴰⴷ ⵢⴰⵡⵉ ⵙ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵡⴰⵎⵎⴰⵙ ⵏ ⵜⵖⵜⴰⵙⵜ ⴰⵙⵔⵜⴰⵏ.

ⵜⵙⴰⵡⵍ ⵓⵍⴰ ⴼ ⵉⵎⵓⴽⵏⵏ ⵣⴷⵉⵏⵉⵏ ⴳ ⵢⵉⵙⴽⵉⵍ ⵏ ⵜⵎⵖⴰⵔⵜ ⴳ ⵍⵎⵖⵔⵉⴱ ⴷ ⵓⵙⴷⵙⵜⵔ ⵏ ⵉⵣⵔⴼⴰⵏ ⵏⵏⵙⵏⵜ ⵙ ⵓⵎⵏⵏⵉ 19 ⴳ ⵓⴷⵓⵙⵜⵓⵔ, ⴷ ⵜⵉⴼⴰⵡⵜ ⵉⵍⵍⴰⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴳ 2002, ⵍⵍⵉⵖ ⵉⵖⵍⵉ ⵓⵏⵛⴽ ⵏ ⵜⵎⵓⵔⴰ ⵙⴳ 5 ⴰⵔ 3 ⵏ ⵜⵎⴰⵔⵉⵜ ⵙ ⵜⵍⴳⴰⵎⵜ ⵜⴰⵏⴰⵎⵓⵔⵜ ⵏ ⵜⵎⵖⴰⵔⵉⵏ, ⴰⵢⵍⵍⵉⵖ ⵍⴽⵎⵏⵜ ⵖⵉⵍⴰⴷ 95 ⵏ ⵜⵎⴰⵔⵉⴳ ⴳ 395, ⴰⵢⵍⵍⵉ ⵉⴳⴰⴷⴷⴰⵏ ⴷ 24%.

ⵜⴱⴷⴷ ⵎⴰⵙⵙⴰ ⵣⵣⵓⵎⵉ ⴳ ⵜⴽⵛⵛⵓⵎⵜ ⵏⵏⵙ ⴼ ⵓⵙⵖⵣⵏ ⵏ ⵓⵙⵍⴳⵏ ⵏ ⵜⵓⵡⵊⴰ ⴳ 2004, ⵜⵉⵏⵉ ⵎⴰⵙ ⵜⵍⵍⴰ ⵙ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵔⴰⵏ ⴰⴷ ⵉⴼⴼⵖ ⵓⵙⵍⴳⵏ ⴰⴷ ⵙⴳ ⵓⴱⵕⵍⴰⵎⴰⵏ ⵍⵍⵉ ⴰⴷ ⵙⵔⵙ ⵉⴼⵔⴽ ⵡⴰⵎⵓⵏ, ⵉⴳ ⴰⵎⵓⴽⵏ ⴰⵎⵣⵡⴰⵔⵓ ⴳ ⵜⵙⴳⴰ ⴰⴷ ⵍⵍⵉ ⴷ ⵢⵉⵡⵉⵏ ⵜⴰⵎⴰⵙⴰⵢⵜ ⵉⵛⵛⴰⵔⵏ ⵏ ⵜⵎⵖⴰⵔⵜ ⴷ ⵓⵔⴳⴰⵣ ⴳ ⵓⵙⵡⵓⴷⴷⵓ ⵏ ⵜⵓⵡⵊⴰ, ⵜⵉⵏⵉ ⵎⴰⵙ ⵉⵙⴷⴷⵉⴷ ⵉⵏⴰⵡ ⵏ ⵓⴷⴰⴱⵓ ⵏ 2022 ⴰⴷⴰⴷ ⴰⴷ, ⵍⵍⵉⵖ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵓⵔ ⵉⵜⵜⵎⴽⵏ ⴰⴷ ⵓⵔ ⵜⴻⵟⵟⵉⴼ ⵜⵎⵖⴰⵔⵜ ⵉⵣⵔⴼⴰⵏ ⵏⵏⵙ ⴳ ⵍⵎⵖⵔⵉⴱ ⵏ ⵡⴰⵙⵙ ⴰⴷ.

ⵜⵉⵏⵉ ⵎⴰⵙⵙⴰ ⵣⵣⵓⵎⵉ ⵎⴰⵙ ⵓⵔ ⴳⵓⵎⵏ ⵉⵣⵣⵔⴰⴼⵏ ⵉⵖ ⵓⵔ ⵉⵟⵟⴰⴼ ⵡⴰⵎⵓⵏ ⵜⴰⴷⵍⵙⴰ ⵏ ⵢⵉⵙⴽⵉⵍ ⵉⵙⵏⴼⵍ ⵉⵙⵡⵉⵏⴳⵉⵎⵏ ⵏⵏⵙ, ⵙ ⵓⵙⵙⴰⵔⵓ ⴳ ⵓⵙⴳⵎⵉ ⴷ ⵓⵙⵙⵍⵎⴷ ⴷ ⵓⵙⵔⵓⵙ ⵏ ⵜⵎⵙⴰⵔⵜ ⵏ ⵜⵎⵖⴰⵔⵉⵏ ⴳ ⵓⴳⵏⵙ ⵏ ⵜⵎⵙⴽⴰⵔ ⵜⵉⵎⴳⵔⴰ.

ⴳ ⵓⵎⵏⵉⴷ ⵏⵏⵙ, ⵜⵏⵏⴰ ⵎⴰⵙⵙⴰ ⵜⴰⵎⵙⵇⵇⴰⴷⵜ ⵏ ⴽⴰⵏⴰⴷⴰ ⴳ ⵕⵕⴱⴰⵟ ⵎⴰⵙ ⵉⵖⵣⵣⵉⴼ ⵓⴱⵔⵉⴷ ⴷⴰⵜ ⵏ ⵓⵙⴽⵔ ⵏ ⵢⵉⵙⴽⵉⵍ ⵉ ⵜⵎⵖⴰⵔⵉⵏ, ⵜⵉⵏⵉ ⵎⴰⵙ ⵜⴳⴰ ⵜⵡⵉⵣⵉ ⵏ ⵜⵎⵖⴰⵔⵉⵏ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⵜⴰⵖⴰⵡⵙⴰ ⵉⵙⵜⴰⵡⵀⵎⵎⴰⵏ ⴳ ⵉⵙⵡⵉⵔⵏ ⴰⵙⵔⵜⴰⵏ ⴷ ⵓⴷⵎⵙⴰⵏ  ⴷⵓⵏⴰⵎⵓⵏ, ⴰⵢⵍⵍⵉ ⵉⵜⵜⴰⵡⵙⵏ ⴳ ⵜⵓⴷⵔⵜ ⵏ ⵜⴰⵡⵊⵉⵡⵉⵏ. ⵜⵙⵓⵜⴳ ⵉⵏⴰⵡ ⵏ ⵓⴷⴰⴱⵓ ⵉⴳⴳⵓⵔⴰⵏ ⵖ ⵍⵍⴰⵏⵜ ⵜⴱⵔⴰⵜⵉⵏ ⵥⵉⵍⵏⵉⵏ ⴼ ⵜⵎⵙⴰⵔⵜ ⵏ ⵜⵎⵖⴰⵔⵉⵏ, ⴷ ⵓⵙⵓⵜⴳ ⵏ ⴽⴰⵏⴰⴹⴰ ⵏ ⵉⵏⵡⴰ ⴰⴷ. ⵜⵙⵎⴷ ⵜⴰⴳⵓⵔⵉ ⵙ ⵡⴰⵡⴰⵍ ⴼ ⵓⵕⵥⵥⵓⵎ ⵏ ⴽⴰⵏⴰⴹⴰ ⵏ ⵓⵙⵎⵓⵙⵙⵓ ⵏ ⵓⵙⵏⴰⵍ ⵏ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵡⴰⵎⵎⴰⵙⵏ ⵏ ⵜⵖⵜⴰⴷⵜ.

ⴳ ⵓⵎⴹⴰⴽⴰⵕ, ⵜⵙⴰⵡⵍ ⵎⴰⵙⴰ ⴽⴰⵕⵓⵍⵉⵏ ⵏⵓⴽⵙ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵓⵙⵜⴰⵢ ⵏ ⵜⵎⵖⴰⵔⵜ ⴷ ⵢⵉⵙⴽⵉⵍ ⴳ ⵓⴱⵕⵍⴰⵎⴰⵏ ⴰⴱⵕⵉⵜⴰⵏⵉ ⴼ ⵜⵉⵔⵎⵉⵜ ⵏ ⵜⵎⴰⵣⵉⵔⵜ ⵏⵏⵙ ⴷ ⵢⵉⴳⵔ ⵏ ⵢⵉⵙⴽⵉⵍ. ⵜⵉⵏⵉ ⵎⴰⵙ ⵉⵣⵣⵉⴳⵣ ⵍⵎⵖⵔⵉⴱ ⵉⵥⵎⵓⵥⵥⴰⵍ ⵥⵉⵍⵏⵉⵏ ⵙⴳ ⴰⵔⵣⴰⴼ ⵏⵏⵙ ⴰⵎⴳⴳⴰⵔⵓ ⵉⵍⵍⴰⵏ ⵓⴳⴳⴰⵔ ⵏ 25 ⵏ ⵓⵙⴳⴳⵯⴰⵙ, ⵜⵉⵏⵉ ⵎⴰⵙ ⵍⵍⵓⵏⵜ ⵜⵉⵡⵡⵓⵔⵉⵡⵉⵏ ⵢⴰⴹⵏⵉⵏ, ⴰⵡⴷ ⵖ ⴱⵕⵉⵟⴰⵏⵢ ⵉⴳⴰⵏ ⵉⵎⵎⴰⵙ ⵏ ⵜⴷⵉⵎⵓⵇⵔⴰⵟⵉⵢⵉⵏ ⵓⵔⵜⴰ ⵉⵍⵍⵉ ⵓⵙⵡⵉⵔ ⵏ ⵓⵙⵎⴰⴷ ⵏ ⵢⵉⵙⴽⵉⵍ ⵉⵙⵎⴷⵏ , ⵎⵇⵇⴰⵔ ⵜⵍⵍⴰ ⵜⴳⵯⵏⵙⴰⵙⵜ ⵏ ⵜⵎⵖⴰⵔⵜ ⴳ ⵜⵙⵔⵜⵉⵜ ⵓⴳⴳⴰⵔ ⵏ ⵜⴰⵙⵓⵜ ⴰⵢⴰ ⴷ, ⴷ ⵉⵖ ⵉⵜⵜⵓⵃⵢⵢⴰⴷ ⵓⵏⴳⵔⴰⵡ ⵏ ⵜⵉⵔⴰⵎ, ⵔⴰⴷ ⴰⴽⵉⵏ ⵓⵎⵉⵣⵏ ⴰⴷ.

ⵙⴰⵡⵍⵏ ⴳ ⵓⵏⵎⵓⵇⵇⴰⵔ ⴰⴷ ⵓⵍⴰ ⵉⵙⵍⵎⴰⴷⵏ ⵉⵎⵓⵣⴰⵢⵏ ⴰⵎ: ⵎⴰⵙⵙ ⵎⵓⵃⴰⵎⴰⵎⴷ ⵍⵖⴰⵍⵉ ⵍⵍⵉ ⵉⵙⴰⵡⵍⵏ ⴼ ⵜⴳⵯⵏⵙⴰⵙⵜ ⵏ ⵜⵎⵖⴰⵔⵉⵏ ⴳ ⵍⵎⵖⵔⵉⴱ ⵙ ⵉⵙⵜⴰⵢⵏ ⵉⵎⴳⵔⴰ ⴷ ⵉⵣⵣⵔⴰⴼⵏ, ⵎⴰⵙⵙ ⴰⵃⵎⴰⴷ ⵎⵓⴼⵉⴷ ⵍⵍⵉ ⵉⵙⴰⵡⵍⵏ ⴼ ⵓⵙⵍⴳⵏ ⵏ ⵓⵥⵕⴼ ⴼⴷ ⵜⵎⵙⴰⵙⵜⵍⵜ ⵉⵣⴷⵉⵏ ⴷ ⵡⴰⵏⴰⵡ ⴰⵏⴰⵎⵓⵏ, ⵎⴰⵙⵙ ⵄⴰⴱⴷⵍⵡⴰⵀⵀⴰⴷ ⵕⵕⴰⵎⵉ ⵍⵍⵉ ⵉⵙⴰⵡⵍⵏ ⴼ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵉⵎⴰⵙⵙⵏ ⵏ ⵓⵎⵢⴰⵡⴰⴷ ⴰⵏⴰⵎⵓⵏ ⴷ ⵓⵙⴷⵓⵙ ⵏ ⵜⴳⵯⵙⴰⵙⵜ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ. ⵙⴰⵡⵍⵏⵜ ⵓⵍⴰ ⵜⵉⵎⵓⵔⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵜⵉⵔⵎⵉⵜⵉⵏ ⵏⵏⵙⵏⵜ ⵣⵍⵉⵏⵉⵏ ,ⵉ ⵓⵙⴷⵓⵙ ⵏ ⵓⵎⵎⵉⵥⵏ ⴷ ⵓⵙⴽⵔ ⵏ ⵢⵉⵙⴽⵉⵍ.