ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵜⵖⵔⵉ ⴼ ⵓⵙⵎⴰⵍ ⴰⵏⴰⵎⵓⵔ ⴷ ⵡⴰⵎⵓⵏ, ⴷⴷⵓ ⵜⵎⴰⵜⴰⵔⵜ: ⵓⵙⵎⴰⵍ ⴰⵏⴰⵎⵓⵔ ⴷ ⵡⴰⵎⵓⵏ, ⵜⵉⵏⴰⵥⴰⵕⵉⵏ ⵏ ⵉⵎⴰⵍ

ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ, 21 ⴷ 22 ⴷⵓⵊⴰⵏⴱⵉⵔ 2022, ⴰⵙⵙ ⵏ ⵜⵖⵔⵉ ⴼ ⵓⵙⵎⴰⵍ ⴰⵏⴰⵎⵓⵔ ⴷ ⵡⴰⵎⵓⵏ ⴷⴷⵓ ⵜⵎⴰⵜⴰⵔⵜ: “ⵙⵎⴰⵍ ⴰⵏⴰⵎⵓⵔ ⴷ ⵡⴰⵎⵓⵏ, ⵜⵉⵏⴰⵥⵕⵉⵏ ⵏ ⵉⵎⴰⵍ” ⴷⴼⴼⵉⵔ ⵎⴰⴷ ⵣⵔⵉⵏ ⵎⵔⴰⵡ ⵉⵙⴳⴳⵯⴰⵙⵏ ⴼ ⵓⵎⵙⴰⵡⴰⵍ ⴰⵏⴰⵎⵓⵔ ⴳ ⵓⵎⵏⵉⴷ ⴰⴷ, ⵉⵙⵙⵉⵅⴼ ⵜ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⴷⵔⴰⵡⵜ ⵏ ⵎⴰⵙⵙ ⵍⵎⵀⴷⵉ ⴱⵏⵙⵄⵉⴷ ⴰⵎⴰⵡⵙⴰⵙ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⵎⵙⴽⴰⵔⵏ ⴳ ⵢⵉⴳⵔ ⵏ ⵜⵏⵖⵎⴰⵙⵜ.

ⴳ ⵜⴳⵓⵔⵉ ⵏ ⵓⵏⵏⵓⵕⵥⵎ, ⵉⴱⴷⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⵙⵎⴰⵍ, ⵍⵍⵉ ⴷ ⵢⵉⵡⵉⵏ 300 ⵏ ⵓⵙⵖⵍⴼ ⴷ ⴽⵉⴳⴰⵏ ⵏ ⵜⵣⵔⴰⵡⵉⵏ ⴼ ⵉⵏⴰⵔⵓⵣⵏ ⵏ ⵉⵄⵔⵔⵉⵎⵏ ⵏ ⵍⵎⵖⵔⵉⴱ ⵙⴳ ⵉⵎⴰⵙⵙⵏ ⵏ ⵓⵙⵎⴰⵍ.

ⵢⵉⵏⵉ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵏⴷⴷⵔ ⴰⵙⵙ ⴰⴷ ⴳ ⵉⵎⵏⴰⴷⵏ ⵉⵎⴰⵢⵏⵓⵜⵏ ⵙ ⵜⵏⴰⵥⴰⵕⵉⵏ ⵜⵉⵎⴰⵢⵏⵓⵜⵉⵏ, ⵜⵙⴽⵔ ⵜⵏⵖⵎⴰⵙⵜ ⵜⵉⵍⴰⵍⵜ ⵜⴰⵅⴰⵜⴰⵔⵜ ⴳ ⵓⵙⵍⴻⵍⵍⵉ ⵙⴳ ⵓⵏⴳⵔⴰⵡ ⵏ ⵓⴼⵔⴰⴳ ⴷ ⵓⵚⴽⵓ ⵏ ⵜⵙⵉⵎⴰⵏⵜ ⴷ ⵜⵔⵙⴰⵍ ⵏ ⵓⵡⴰⵏⴽ ⴰⵏⴰⵎⵓⵔ ⴰⴷⵉⵎⵓⵇⵔⴰⵟⵉ ⴷ ⵓⴼⵔⴰⴳ ⵏ ⵜⵎⵏⵏⴰⵡⵜ, ⵎⵇⵇⴰⵔ ⵜⵣⵣⵔⵉ ⵜⵎⴰⵣⵉⵔⵜ ⵏⵏⵖ ⵉⵣⵎⴰⵣ ⵛⴷⴷⴰⵏⵉⵏ, ⵀⴰⵜ ⵜⵥⴹⴰⵕ ⴰⴷ ⵜⴻⵟⵟⵉⴼ ⵜⴰⵏⵖⵎⴰⵙⵜ ⵜⵉⵍⴻⵍⵍⵉ ⵉⵎⵎⴰⵍⴰⵏ ⴰⵏⴰⵡ ⴰⵎⵏⵏⴰⵡ ⵏ ⵡⴰⵎⵓⵏ ⴰⵎⵖⵔⵉⴱⵉ ⴷ ⵜⵎⴰⴳⵉⵜ ⵏⵏⵙ.

ⵖⵎⴽ ⵍⵍⵉ ⵉⵙⴰⵡⵍ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⴼ ⵜⵏⴰⵥⴰⵕⵉⵏ ⵏ ⵜⴳⵔⴰⵡⵍⵍⴰ ⵜⴰⵎⵓⵟⵟⵓⵏⵜ ⴷ ⵓⵣⵓⵣⵣⵔ ⵏ ⵉⵏⵖⵎⵉⵙⵏ ⵜⴰⵔ ⵜⴰⴼⴰⴷⴰ ⵜⴰⵣⵣⵓⵍⴰⵏⵜ ⵍⵍⵉⵖ ⵜⵉⵡⵙ ⵜⴻⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ ⴳ ⵓⵣⵓⵣⵣⵔ ⵉⴳⴳⵓⵜⵏ ⵏ ⵉⵏⵖⵎⵉⵙⵏ ⴳ ⵓⵎⴰⴹⴰⵍ ⴰⴽⴽⵯ.

ⵉⵙⴰⵡⵍ ⵓⵍⴰ ⴼ ⵡⴰⵔⴰⵏⵔⴰⵎⴰⵙ ⵉⵍⵍⴰⵏ ⵊⴰⵔ ⵓⵙⵔⵜⴰⵏ ⴷ ⵓⵏⵖⵎⴰⵙ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⴼ ⵓⵙⵔⵜⴰⵏ ⴰⴷ ⵉⵏⵏⵓⵕⵥⵎ ⴼ ⵜⵏⵖⵎⴰⵙⵜ, ⵉⵙⵓⵊⵉⴷ ⵜⵉⵎⵓⵛⵉ ⵉ ⵉⵙⵎⵔⵙ ⴰⵏⵖⵎⴰⵙ. ⵖⵎⴽ ⵍⵍⵉ ⴷ ⵉⵇⵇⴰⵏ ⴼ ⵓⵏⵖⵎⴰⵙ ⴰⴷ ⴷⴰⵔⵙ ⵜⵉⵍⵉ ⵜⵎⵢⵉⵎⴰⵏⵜ ⴳ ⵉⵏⵖⵎⵉⵙⵏ ⵏ ⵜⵎⵔⵙⴰⵍ ⴷ ⵉⵎⵙⴽⴰⵔⵏ ⵉⵙⵔⵜⴰⵏⵏ ⵙ ⵎⴰⴷ ⵉⵜⵚⵉⵃⵉⵏ ⵉ ⵡⴰⵎⵓⵏ ⵢⴰⵍⵍ ⴰⵙⵡⵉⵔ ⵏ ⵓⵎⴹⴰⴽⴰⵔ ⴰⴳⴷⵓⴷⴰⵏ.

ⵉⵙⴰⵡⵍ ⵎⴰⵙⵙ ⴱⵏⵙⵄⵉⴷ ⴰⵎⴰⵡⵙⴰⵙ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⴼ ⵡⴰⵜⵉⴳ ⵏ ⵜⵏⵖⵎⴰⵙⵜ ⴳ ⵜⵓⴷⵔⵜ ⵏ ⵉⵏⵎⵓⵔⴰⵏ ⴷ ⵜⴷⵉⵎⵓⵇⵔⴰⵟⵉⵜ, ⵉⵖⵔ ⵉ ⵓⵣⵣⵔⴰⵓ ⵏ ⵓⵙⵍⴳⵏ ⵏ ⵜⵏⵖⵎⴰⵙⵜ ⴷ ⵜⵥⵕⵉⵕⴳⵜ ⴷ ⵡⴰⵏⴰⵡ ⴰⴷⵎⵙⴰⵏ ⵏ ⵜⵎⵙⵙⵏⵜⴰⵢⵜ ⵜⴰⵏⵖⵎⴰⵙⵜ ⵙ ⵓⵙⵏⴰⵍ ⵏ ⵉⵎⵙⵡⵓⵔⵉⵢⵏ, ⵍⵍⵉⵖ ⵉⵎⵎⴰⵜⵜ ⵓⵙⵏⴰⵍ ⴰⴳⴷⵓⴷⴰⵏ ⵙⴳ 36 ⵎⵍⵢⵓⵏ ⴷⵔⵀⵎ ⴰⵔ 200 ⵎⵍⵢⵓⵏ ⴷⵔⵀⵎ, ⵉⵖⵔ ⵓⵍⴰ ⵓⵙⵎⵖⵔ ⵏ ⵓⵙⵓⵔⵙ ⴰⵏⴰⵎⵓⵏ ⵉⵏⵖⵎⴰⵙⵏ ⵃⵎⴰ ⴰⴷ ⵜⵉⵍⵉ ⵜⵏⵖⵎⴰⵙⵜ ⵉⵥⵉⵍⵏ.

ⵉⵙⴷⴷⵉⴷ ⵎⴰⵙⵙ ⵢⵓⵏⵙ ⵎⵓⵊⴰⵀⵉⴷ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵖⵎⴰⵙⵜ, ⴼ ⵓⵍⵜⴰⵖ ⵉⴼⴰⵡⵏ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵎⵙⴰⴰⵍ ⴰⴷ ⵙⴳ 2010, ⵍⵍⵉ ⵢⵓⵎⴰⵏ ⵉⵎⵙⴽⴰⵔⵏ ⴳ ⵢⵉⴳⵔ ⵏ ⵜⵏⵖⵎⴰⵙ ⵜ ⴷ ⵓⵙⵎⵓⵜⵜⴳ ⴷ ⵜⵎⵔⵙⴰⵍ ⵅⴼ ⵜⴽⵕⴹⴰ ⵏ ⵜⵎⴳⵓⵔⵉ ⵜⴰⵏⵖⵎⴰⵙⵜ ⴷ ⵓⵙⵎⵖⵔ ⵏⵏⵙ ⴳ ⵜⵎⵙⵙⵏⵜⴰⵢ ⴷⵓⵙⵏⵉⵏ ⵅⴰⵜⵔⵏⵉⵏ, ⵖⵎⴽ ⴰⵏⵏ ⴰⴼ ⵙⴰⵡⵍ ⵉⵙⵖⵍⴰⴼ ⵓⵙⴽⵔ ⵏ ⵓⵙⵍⴳⵏ ⵏ ⵜⵏⵖⵎⴰⵙⵜ ⴷ ⵜⵙⵏⵙⵉ ⵏ ⵓⵎⵓⴽⵏ ⴰⴷⵙⵜⴰⵔ ⵏ 2011 ⵍⵍⵉ ⴷ ⵢⵉⵡⵉⵏ ⴰⴷ ⵢⵉⵍⵉ ⵓⵙⵇⵇⵉⵎ ⴰⵏⴰⵎⵓⵔ ⵉ ⵜⵏⵖⵎⴰⵙⵜ ⵍⵍⵉ ⵢⵉⵡⵙⵏ ⴳ ⵓⵙⵖⵓⴷⵓ ⵏ ⵜⵣⵣⵓⵍⵜ ⵏ ⵜⵏⵖⵎⴰⵙⵜ ⵎⵇⵇⴰⵔ ⵍⵍⴰⵏⵜ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⵜⵉⵣⵔⴼⴰⵏⵉⵏ ⴷ ⵜⵎⴰⴷⴷⴰⵙⵉⵏ.

ⵉⵙⴷⴷⵉⴷ ⵎⴰⵙⵙ ⵄⴰⴱⴷⵓⵍⵍⴰⵀ ⵍⴱⵇⵇⴰⵍⵉ, ⴰⵏⵙⵙⵉⵅⴼ ⵏ ⵓⵏⵎⵓⵍⵍⵉ ⴰⵏⴰⵎⵓⵔ ⵏ ⵜⵏⵖⵎⴰⵙⵜ ⵜⴰⵎⵖⵔⵉⴱⵉⵜ ⴼ ⵓⵎⵓⵔⵙ ⵏ ⵉⵙⵖⵍⴰⴼ ⵏ ⵓⵎⵙⴰⵡⴰⵍ ⴰⴷ ⵍⵍⵉ ⴼ ⵣⵔⵉⵏ 10 ⵉⵙⴳⴳⵯⴰⵙⵏ, ⵍⵍⵉⵖ ⵓⴽⴰⵏ ⵙⵓⵍ ⵢⴰⴳⴳⵓⴳ ⵓⵙⴽⵔ ⵉⵍⵍⴰⵏ ⴼ ⵉⵏⴰⵔⵓⵣⵏ ⵏ ⵉⵏⵖⵎⴰⵙⵏ, ⵉⴼⴽ ⴽⵉⴳⴰⵏ ⵏ ⵜⵎⵉⵜⴰⵔ ⵥⵍⵉⵏⵉⵏ ⴷ ⵓⵙⵖⵓⴷⵓ ⴷ ⵜⵓⵎⴰⵢⵜ ⴷ ⵓⵣⵣⵔⴰⴼ ⴷ ⵜⵣⵔⴼⵜ ⴷ ⵜⵏⵏⵓⴱⴹⴰ ⴷ ⵓⵙⵏⴰⵍ ⴰⴳⴷⵓⴷⴰⵏ ⴷ ⵜⵉⴷⵜ ⵏ ⵡⴰⵏⴰⵡ ⴰⴷⵎⵙⴰⵏ ⵏ ⵜⵎⵙⵙⵏⵜⴰⵢⵜ ⵜⴰⵏⵖⵎⴰⵙⵜ ⵉⵔⵎⵙⵏ.

ⵉⵏⵏⴰ ⵎⴰⵙⵙ ⵏⵓⵔⴷⴷⵉⵏ ⵎⵉⴼⵜⴰⵃ, ⴰⵏⵙⵙⵉⵅⴼ ⵏ ⵜⴼⵉⴷⵉⵕⴰⵍⵉⵜ ⵜⴰⵎⵖⵔⵉⴱⵉⵜ ⵏ ⵉⵎⵣⵔⵉⴳⵏ ⵏ ⵉⵖⵎⵉⵙⵏ, ⵎⴰⵙ ⵜⵙⵎⵓⵙⵙⵓ ⵜⵏⵖⵎⴰⵙⵜ ⵜⴰⴷⵉⵎⵓⵇⵔⴰⵟⵉⵜ, ⵏⵉⵍⵉ ⴰⵙⵙ ⴰⴷ ⴷⴰⵜ ⵏ ⵜⵉⵍⴰⵡⵜ ⵜⴰⵎⴰⵢⵏⵓⵜ ⵏ ⵜⵏⵖⵎⴰⵙⵜ, ⴷⴰⵜ ⵏ ⵜⵏⴰⵥⴰⵕⵜ ⵏ ⵜⵉⵍⵉⵜ ⵏ ⵜⵏⵖⵎⴰⵙⵜ ⵏ ⵓⴼⵔⴽⵓⴽ ⵍⵍⵉ ⵎⵓ ⵍⴰⵃ ⴳ ⵙⵉⵏ ⵉⵙⴳⴳⴰⵙⵏ 70% ⵏ ⵓⵣⵓⵣⵣⵔ ⵏ ⵉⵙⵓⴳⴰⵎ, ⵢⵉⵏⵉ ⵎⴰⵙ ⵢⵉⵡⵙ ⵓⵙⵏⴰⵍ ⵏ ⵓⵡⴰⵏⴽ ⴳ ⵓⵣⵎⵣ ⵏ ⵓⴱⴰⵢⵢⵓⵕ ⴳ ⵜⵓⴷⵔⵜ ⵏⵏⵙ ⵍⵍⵉⵖ ⵜⴳⴰⴷⴷⴰ ⴷ 10 ⵉⵙⴳⴳⵯⴰⵙⵏ ⵏ ⵓⵙⵏⴰⵍ ⵉⵣⵔⵉⵏ.

ⵉⵙⴷⴷⵉⴷ ⵎⴰⵙⵙ ⵄⴰⴱⴷⵍⵍⴰⵟⵉⴼ ⴱⵏⵚⴼⵉⵢⵢⴰ, ⴰⵏⵎⵀⴰⵍ ⵏ ⵓⵙⵉⵏⴰⴳ ⴰⵎⴰⵜⵜⵓⵢ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ , ⴼ ⵓⵙⵡⵉⵔ ⵉⵍⵍⴰⵏ ⴷⴰⵔ ⵓⵙⵎⵓⵜⵜⴳ ⴷ ⵓⵙⵎⵓⵜⵜⴳ ⴰⵙⵓⵍⴰⵏ ⵉ ⵚⴰⵃⴰ ⵏ ⵉⵏⵖⵎⴰⵙⵏ, ⴷ ⵎⴰⵙ ⴷ ⵉⵇⵇⴰⵏ ⵓⵎⵓⴽⵏ ⴰⴱⵉⴷⴰⴳⵓⵊⵉ ⵏ ⵓⵙⵎⵓⵜⵜⴳ ⴰⵏⵖⵎⴰⵙ ⵉ ⵓⴼⵔⴰⴳ ⵏ ⵜⴷⵍⵙⴰ ⵜⴰⵏⵖⵎⴰⵙⵜ ⴷ ⵓⵙⵎⵖⵔ ⵏ ⵜⵎⴳⵓⵔⵉ ⵜⴰⵏⵖⵎⴰⵙⵜ ⴷ ⵓⵔⵣⵣⵓ ⴰⵎⴰⵙⵙⴰⵏ ⴳ ⵓⵎⵏⵉⴷ ⴰⴷ ⵃⵎⴰ ⴰⴷ ⵉⵍⵉⵏ ⵉⵏⵖⵎⴰⵙⵏ ⴼⵔⴽⵏⵉⵏ ⵙ ⵜⵖⴰⵔⵉⵡⵉⵏ ⵜⵉⵣⵣⵓⵍⴰⵏⵉⵏ.

ⵉⵙⴷⴷⵉⴷ ⵎⴰⵙⵙ ⴰⵃⵎⴰⴷ ⵅⵛⵉⵛⵏ ⵍⵍⵉ ⵢⵉⵡⵙⵏ ⴳ ⵓⵎⵙⴰⵡⴰⵍ ⴰⵏⴰⵎⵓⵔ ⵏ 2010 ⵎⴰⵙ ⵜⴷⴷⵔ ⵜⵏⵖⵎⴰⵙⵜ ⵏ ⵍⵎⵖⵔⵉⴱ ⴳ ⵓⵙⵓⵔⵙ ⵉⵛⴷⴷⴰⵏ ⴷⴼⴼⵉⵔ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⵢⵉⵏⵉ ⵓⵍⴰ ⴰⵎⴰⵙ ⴷ ⵉⵇⵇⴰⵏ ⵓⴽⵜⵜⴰⵢ ⵏ ⵉⵙⵖⵍⴰⴼ ⵏ ⵓⵎⵙⴰⵡⴰⵍ ⴰⵏⴰⵎⵓⵔ ⵍⵍⵉ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵓⴳⴳⴰⵔ ⵏ ⵎⵔⴰⵡ ⵉⵙⴳⴳⵯⴰⵙⵏ, ⵉⵙⴰⵡⵍ ⴼ ⵜⵎⵓⴽⵔⵉⵙⵉⵏ ⴷⴰⵜ ⵏ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ ⵎⵀⴰⵍ ⵏ ⵜⵏⵖⵎⴰⵙⵜ ⵜⴰⵍⵉⴽⵟⵕⵓⵏⵉⵜ, ⴰⵢⵍⵍⵉ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵏⴰⵍ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴳ ⵜⵡⴰⴼⵉⵜ ⵏ ⵜⵖⴰⵔⴰⵙⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵙⵏⴰⵍ.

ⵎⵙⴰⵙⴰⵏ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵓⵙⵎⵖⵔ ⵏ ⵉⵙⵓⵔⵙⵏ ⵉⵏⴰⵎⵓⵏⵏ ⴷ ⵉⵣⵣⵓⵍⴰⵏⵏ ⵏ ⵉⵏⵖⵎⴰⵙⵏ, ⴷ ⵜⵍⴻⵍⵍⵉ ⵏ ⵡⴰⵡⴰⵍ ⴷ ⵜⵏⵖⵎⴰⵙⵜ ⴷ ⵓⵙⴽⵔ ⵏ ⵓⵙⵎⴰⵍ ⵏ ⵜⵎⵙⴽⴰⵔ ⵏⵏⵙ ⵜⵉⴷⵙⵍⴰⵏⵉⵏ ⴷ ⵓⵙⴼⵔⴽ ⴷ ⵓⵙⵏⵖⵎⵙ  ⴷ ⵓⵙⴷⵙⵓ ⵏ ⵜⴷⵎⵓⵇⵔⴰⵟⵉⵜ ⴷ ⵜⵎⵔⵙⴰⵍ ⴷ ⵜⴷⵔⴰⵡⵜ ⵏ ⵉⵏⵎⵓⵔⴰⵏ ⴳ ⵜⵙⵔⵜⵉⵜ ⴷ ⵓⵍⵜⴰⵖ ⵏⵏⵙⵏ ⴳ ⵜⴷⵉⵏⴰⵎⵉⵜ ⵜⴰⵎⴰⵜⴰⵢⵜ.

ⵉⵍⵍⴰ ⵓⵙⵎⴰⴷ ⵏ ⵡⴰⵙⵙⴰ ⴰⴷ ⴳ 22 ⴷⵓⵀⴰⵏⴱⵉⵔ 2022, ⵉⵥⵍⵉ ⵉ ⵓⵙⵙⴼⵍⴷ ⵉ ⵜⴳⵔⴰⵡⵉⵏ ⵜⵉⵣⵣⵓⵍⴰⵏⵉⵏ ⵏ ⵜⵏⵖⵎⴰⵙⵜ ⵍⵍⵉ ⴼⴽⴰⵏⵉⵏ ⵜⵉⵙⵓⵎⵔⵉⵏ ⵏ ⵓⵙⵎⵖⵔ ⵏ ⵉⵙⵓⵔⵙⵏ ⵏ ⵜⵏⵖⵎⴰⵙⵜ, ⴷ ⵓⵙⵎⴰⵢⵏⵓ ⵏ ⵏ ⵢⵉⴳⵔ ⴰⴷ ⵃⵎⴰ ⴰⴷ ⵜⵎⵙⵙⵏⵜⴰⵢⵜ ⵜⴰⵏⵖⵎⴰⵙⵜ ⵜⴰⴷ ⵉⵙⴽⴰⵔⵏ ⴰⵙⵡⵉⵏⴳⵎ ⴷ ⵜⵉⵍⵉⵜ ⵏ ⵓⵙⵍⴳⵏ ⴰⵙⴰⵜⵉ ⵍⵍⵉ ⵉⵙⵏⵎⴰⵍⴰⵏ ⵉⴳⵔⴰ ⴷ.

ⴳ ⵜⴳⵉⵔⴰ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵏⵏⵓⵕⵥⵎ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴼ ⵎⴰⵕⵕⴰ ⵏ ⵉⵎⵙⴽⴰⵔⵏ ⴳ ⵢⵉⴳⵔ ⴰⴷ ⴷ ⵓⵙⵡⵓⵔⵉ ⵏⵏⵙ ⵉ ⵓⵙⵓⵊⴷ ⵏ ⵜⵙⵓⵎⴰⵔ ⵉ ⵓⵙⵎⵖⵔ ⵏ ⵓⵙⵎⴰⵍ ⴰⵏⴰⵎⵓⵔ ⴷ ⵓⵙⵖⵓⴷⵓ ⵏ ⵉⵙⵍⴳⵏⵏ ⵏⵏⵙ ⴷ ⵓⵙⵖⵓⴷⵓ ⵏ ⵉⵙⵓⵔⵙⵏ ⵉⵏⴰⵎⵓⵏⵏ ⵏ ⵉⵎⵙⵡⵓⵉⵢⵏ ⵏⵏⵙ, ⵢⵉⵏⵉ ⵎⴰⵙ ⵔⴰⴷ ⵢⵉⵍⵉ ⵓⵙⵎⵓⵏ ⵏ ⵉⵙⵖⵍⴰⴼ ⴷ ⵓⵙⴽⵔ ⵏ ⵓⵏⵇⵇⵉⵙ ⵍⵍⵉ ⵔⴰⴷ ⵢⵉⵎⵖⵓⵔ ⵙ ⵜⵡⵉⵣⵉ ⵏ ⵎⴰⵕⵕⴰ ⵏ ⵉⵎⵙⴽⴰⵔⵏ ⴳ ⵢⵉⴳⵔ ⴰⵏⵖⵎⴰⵙ.