ⴰⵙⵎⵏⵉⴷ ⵏ ⵓⵎⴰⵡⵙⴰⵙ ⵏ ⵜⵣⵔⴼⵜ ⴷⴰⵜ ⵏ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⵎⵙⴽⴰⵔ ⵏ ⵜⵎⴰⵡⴰⵙⵜ ⵏⵏⵙ ⵖ ⵜⵣⵣⵉⴳⵣⵜ ⵏ ⵜⵎⵙⵙⵓⴳⵓⵔⵜ ⵜⴰⵣⵔⴼⴰⵏⵜ ⴷ ⵓⵃⵟⵟⵓ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⵖ ⴽⵓ ⵜⵉⵙⵏⴱⴹⴰⵢⵉⵏ ⵖ ⵓⵣⵎⵣ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵏⴰⵙ 2 ⵢⵓⵏⵢⵓ 2020, ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵎⴰⵙⵙ ⵜⴰⵡⴼⵉⵇ ⵍⵎⴰⵢⵎⵓⵏⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵄⴰⴱⴷ ⵍⵇⴰⴷⵔ ⴰⵎⴰⵡⵙⴰⵙ ⵏ ⵜⵣⵔⴼⵜ ⵉ ⵓⵎⴹⴰⴽⴰⵕ ⵏ ⵜⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵍⵍⵉ ⵉⴹⵎⵏⵏ ⵜⴰⵣⵣⵉⴳⵣⵜ ⵏ ⵜⵎⵙⵙⵓⴳⵓⵔⵜ ⵜⴰⵣⵔⴼⴰⵏⵜ ⵖ ⵓⵙⴱⴷⴷⵉ ⵏ ⵜⵎⴰⵣⵉⵔⵜ ⵏⵏⵖ ⵉ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵖ ⵜⵣⵡⵉⵔⵉ ⵏ ⵓⵙⵎⵏⵉⴷ ⵏⵏⵙ:” ⵜⴰⵎⴰⵡⴰⵙⵜ ⵏ ⵜⵣⵔⴼⵜ ⵜⴳⴰ ⵣⵓⵏ ⴷ ⵜⵉⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ, ⵜⵙⴽⵔ ⴽⵉⴳⴰⵏ ⵏ ⵉⵙⵡⵓⴷⴷⵓⵜⵏ  ⵖ ⵜⵍⵍⴰ ⵜⵖⵜⵙⵜ ⵏ ⵓⵙⴱⴷⴷⵉ ⵏ ⵓⵙⴽⵔ ⵏ ⵜⵖⵉⵎⵉⵜⵉⵏ ⵖ ⴽⵓ ⵜⵉⵙⵏⴱⴹⴰⵢⵉⵏ ⵏ ⵜⴳⵍⴷⵉⵜ ⵙⴳ 17 ⵎⴰⵕⵚ, ⵖ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⴷ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ (ⴽⵓⴼⵉⴷ19), ⵉ ⵜⴼⴰⵜⵉⵜ ⵏ ⴽⵓ ⵉⵎⵙⵡⵓⵔⵉⵢⵏ ⵖ ⵜⵙⵏⴱⴹⴰⵢⵉⵏ ⵏ ⵜⴳⵍⴷⵉⵜ, ⵖ ⴳⴰⵏ ⵉⵏⴱⴹⴰⵡⵏ ⴷ ⵉⵎⵙⵖⴰⵏⵏ ⴷ ⵉⵎⴰⵡⴰⵙⵏ ⵏ ⵢⵉⴳⵔ ⵏ ⵜⵣⵔⴼⵜ, ⵖⵎⴽ ⴰⵏⵏ ⴷ ⵉⵎⵙⴰⵕⴰⴹⵏ ⴷ ⵉⵏⵔⵣⴰⴼ ⵏ ⵜⵎⵙⵙⵓⴳⵓⵔⵜ ⴰⴷ, ⴷⴼⴼⵉⵔ ⵏ ⵓⵣⴷⴷⵓⵢ  ⴷ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵣⵔⴼⴰⵏⵜ”.

ⵉⵍⵇⵎ ⵎⴰⵙⵙ ⴰⵎⴰⵡⵙⴰⵙ ⵢⵉⵏⵉ:”ⴰⵙⵏⵙⵉ ⵏ ⵓⵏⴳⵔⴰⵡ ⵏ ⵓⵙⴰⵕⴰⴹ ⵙ ⵜⴻⵜⵉⵇⵏⵉⵜ ⵏ ⵓⴼⵓⵣⵢⵓⴽⵓⵏⴼⵉⵕⵓⵏⵚ, ⵉⵡⵉⵏ ⵜ ⴷ ⵉⴷⵔⵉⵣⵏ ⵏ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ “ⴽⵓⵕⵓⵏⴰ”, ⵉ ⵓⵃⵟⵟⵓ ⵏ ⵜⴼⴰⵜⵉⵜ ⵏ ⵉⵏⴽⵔⴰⴼⵏ ⴷ ⵎⵉⴷⴷⵏ  ⵏ ⵜⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⵉⵜⵜⵓⵙⵎⴰⴳⵍⵏ ⵙ ⵡⴰⵙⵙⴰⵢ ⴷ ⵓⴹⵓⴼ ⵏⵏⵙⵏ, ⵖⵎⴽ ⴰⵏⵏ ⴷ ⵜⴼⴰⵜⵉⵜ ⵏ ⵉⵏⴱⴹⴰⵡⵏ ⴷ ⵉⵎⵙⵖⴰⵏⵏ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ  ⴷ ⵉⵎⵙⵖⴰⵏⵏ ⵏ ⵜⵙⵏⴱⴹⴰⵢⵉⵏ”.  

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ, ⴷⴼⴼⵉⵔ ⵏ ⵓⵙⵔⵓⵙ ⵏ ⵜⴻⵜⵉⵇⵏⵉⵜ ⵏ ⵓⵎⵙⴰⵕⴹ ⵙ ⵜⵉⴳⴳⵓⴳⵜ ⵍⵍⵉ ⴷ ⵜⵉⵡⵉ ⵜⵎⵙⵓⵜⵍⵜ ⵉⵥⵍⵉⵏ, ⵎⴰⵙ ⵜⵙⴽⵔ ⵜⵎⴰⵡⴰⵙⵜ ⵎⴰ ⴷ ⵉⴳⴰⴷⴷⴰⵏ ⴷ 190 ⵏ ⵓⵎⵉⴹⴰⵏ ⴰⵍⵉⴽⵟⵕⵓⵏⵉ ⵍⵍⵉ ⵜⵣⵓⵣⵣⵔ ⴼ ⵜⵙⵏⴱⴹⴰⵢⵉⵏ ⴷ ⵉⵖⵣⵓⵜⵏ ⵢⵉⵍⵉ ⵓⵣⴷⴷⵓⵢ ⴷ ⵉⵎⵙⵜⴳⴳⴰⵔⵏ ⵉⵏⵣⵔⴰⴼⵏ ⴷ ⵜⵎⵀⵍⵉⵡⵉⵏ ⵜⵉⵏⵎⵏⴰⴹⵉⵏ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⵃⵎⴰ ⴰⴷ ⵢⵉⵍⵉ ⵓⵎⴰⵡⴰ ⵏ ⵜⵙⵏⴷⴹⴰⵢⵉⵏ ⴷ ⵜⴷⴰⵍⵉⵡⵉⵏ ⵥⵍⵉⵏⵉⵏ ⵖ ⵉⵖⵣⵓⵜⵏ ⵙ ⵉⵎⵙⵙⵓⴷⵙⵏ ⵥⵍⵉⵏⵉⵏ  ⵙ ⵜⵡⵓⵔⵉ ⴰⴷ, ⵖⵎⴽ ⴰⵏⵏ ⵓⵍⴰ ⵉⵖⴰⵡⴰⵙⵏ ⵉⵍⵉⴽⵟⵕⵓⵏⵉⵢⵏ ⵥⵍⵉⵏⵉⵏ  ⵖ ⴽⴽⵓⵥ ⵓⵙⵙⴰⵏ.

ⵎⵇⵇⴰⵔ ⵓⵔ ⵉⵍⵍⵉ ⵓⴹⵕⵉⵚ ⴰⵣⵣⵔⴰⴼ ⵉⴱⴷⵔⵏ ⴰⵙⴽⵔ ⵙ ⵜⴻⵜⵉⵇⵏⵉⵜ ⴰⴷ, ⵉⵏⵏⴰ ⵎⴰⵙⵙ ⴱⵏ ⵄⴰⴱⴷ ⵍⵇⴰⴷⵔ:” ⵜⵉⵎⵙⵓⵜⴰⵍ ⵜⵉⵎⴰⵜⴰⵢⵉⵏ ⵍⵍⵉ ⵜⵣⵣⵔⴰⵢ ⵜⴳⵍⴷⵉⵜ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⴰⴷ, ⵓⵊⵊⴰⵏⵜ ⴰⴷ ⵎⵎⴰⵖⵏ ⴽⵓ ⵉⴼⵔⴷⴰⵙ ⵏ ⵜⵣⵔⴼⵜ ⵖ ⵓⵍⵜⴰⵖ ⵖ ⵜⵓⴳⴳⴰⵙ ⵍⵍⵉ ⵉⵙⴽⵔ ⵓⵡⴰⵏⴽ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏⵏⵙ, ⵜⵉⵍⵉ ⵜⵏⴼⵔⵓⵜ ⵜⴰⴷⵓⵙⴰⵏⵜ ⵏ ⵉⵏⴱⴹⴰⵡⵏ  ⴷ ⵉⵎⵙⵖⴰⵏⵏ  ⵏ ⵓⵏⴳⵎⴰⵎ ⵏ ⵜⵉⵔⵔⴰ ⵏ ⵓⵣⵎⵎⴻⵎ ⴷ ⵉⵎⵙⵜⴰⵏⵏ ⴷ ⵉⵏⴽⵔⴰⴼⵏ, ⵜⵜⵓⵙⴽⴰⵔⵏⵜ ⵖ ⵜⵙⵏⴱⴹⴰⵢⵉⵏ ⵏ ⵡⴰⵍⴰⵙ ⵖ ⵜⴳⵍⴷⵉⵜ ⵜⵉⵙⵇⵇⵉⵎⵉⵏ ⵜⵉⵎⴽⵕⴰⴹⵉⵏ ⵖ ⵍⵍⴰⵏ ⵉⵏⵙⵙⵉⵅⴼⵏ ⵉⵎⵣⵡⵓⵔⴰ ⵏ ⵜⵙⵏⴱⴹⴰⵢⵉⵏ ⴰⴷ ⴷ ⵉⵙⵎⴰⴳⴰⵍⵏ ⵉⵎⴰⵜⴰⵢⵏ ⵏ ⵓⴳⵍⵍⵉⴷ ⴳⵉⵙⵏⵜ ⴷ ⵉⵎⵣⵡⴰⵔⵏ ⵏ ⵉⵎⵙⵜⴰⵏⵏ, ⵢⵉⵍⵉ ⵓⵎⵛⴰⵛⴽⴰ ⴼ ⵓⵙⵔⵓⵙ ⵏ ⵜⴻⵜⵉⵇⵏⵉⵜ ⴰⴷ ⵙ ⵜⵉⵕⵡⵉ ⵏⵏⵙ ⴷ ⵡⴰⵜⵉⴳ ⵏⵏⵙ ⵖ ⵜⵎⵙⵓⵜⴰⵍ ⵏ ⵖⵉⵍⴰⴷ”.

ⵉⵣⵎⵎⵉⵎ ⵎⴰⵙⵙ ⴰⵎⴰⵡⵙⴰⵙ ⵖ ⵓⵎⵏⵉⴷ ⵏ ⵜⵢⴰⴼⵓⵜ ⵏ ⵓⵙⴰⵕⴰⴹ ⵙ ⵜⵉⴳⴳⵓⴳⵜ ⵎⴰⵙ ⵜⵍⵍⴰ ⵜⵢⴰⴼⵓⵜ ⵉⵥⵉⵍⵏ ⴷⴼⴼⵉⵔ ⵎⴰ ⴷ ⵣⵔⵉⵏ ⴽⴽⵓⵥ ⵉⵎⴰⵍⴰⵙⵙⵏ ⴼ ⵓⵙⵡⵓⵔⵉ ⵙ ⵜⴻⵜⵉⵇⵏⵉⵜ ⴰⴷ, ⴰⵢⵍⵍⵉ ⵏⵉⵜ ⵎⵎⴰⵍⴰⵏ ⵓⵟⵟⵓⵏⵏ ⴷ ⵉⵙⵏⵎⴽⵜⴰⵜⵏ ⵉⵜⵜⵓⵣⵎⵎⴰⵎⵏ, ⵖⵉⴽ ⴰⵏⵏ ⴰⴼ ⵉⵍⴽⵎ ⵓⵟⵟⵓⵏ ⵏ ⵜⵖⵉⵎⵉⵜⵉⵏ ⵍⵍⵉ ⵙⴽⵔⵏⵜ ⵜⵙⵏⴱⴹⴰⵢⵉⵏ ⵏ ⵜⴳⵍⴷⵉⵜ 1469 ⵏ ⵜⵖⵉⵎⵉⵜ, ⵖ ⵉⵍⵍⴰ 22 ⵏ ⵉⴼⴹ ⴷ 268 ⵏ ⵜⵎⵙⴰⵔⵜ, ⵉⵍⴽⵎ ⵓⵟⵟⵓⵏ ⵏ ⵉⴱⵟⵟⵓⵜⵏ ⵍⵍⵉ ⴷ ⴼⴼⵓⵖⵏⵉⵏ ⵖ ⵜⵖⵉⵎⵉⵜⵉⵏ ⴰⴷ 9035 ⵏ ⵓⴱⵟⵟⵓ ⵏ ⵓⵣⵔⴼ.

ⵜⴻⵜⵜⵓⴼⴽⴰ ⵜⵣⵡⵉⵔⵉ ⴷ ⵡⴰⵜⵉⴳ ⵉⵅⴰⵜⴰⵔⵏ ⵉ ⵜⵏⴼⵔⵓⵜ ⵏ ⵓⵎⵍⴰⵏ, ⴷ ⵓⵡⵇⵇⵔ ⵏ ⵉⵙⵡⴰⵍⴰⵢⵏ ⵏ ⵜⵎⵀⵍⴰ ⵏ ⵜⵏⴼⵔⵓⵜ ⵏ ⵓⵥⵟⵟⴰ ⵏ ⵓⵎⵍⴰⵏ ⵖ  ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ ⵉ ⵜⴼⴰⵜⵉⵜ ⵏ ⵓⵃⵟⵟⵓ ⴷ ⵜⵏⴼⵔⵓⵜ ⵏ ⵓⵏⴳⵔⴰⵡ ⴰⵙⵍⵉⵥⵕ ⵍⵍⵉ ⵉⵍⵍⴰⵏ.

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵜⴳⴰ ⵜⵎⵙⴽⵔⵜ ⴰⴷ ⵜⴰⵎⵣⵔⴰⵢⵜ ⵍⵍⵉ ⵔⴰⴷ ⵢⴰⵡⵙ ⵖ ⵓⴽⵛⵎ ⵙ ⵓⵎⴰⴹⴰⵍ ⵏ ⵜⵎⵓⵟⵟⵓⵏⵜ ⴷ ⵓⵎⵢⴰⵡⴰⴹ ⵙ ⵜⵉⴳⴳⵓⴳⵜ ⵖ ⵜⵡⵓⵔⵉ ⵏ ⵜⵣⵔⴼⵜ, ⵉⵙⴷⴷⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵚⴽⵓ ⴼ ⵉⵏⵙⴷⴰⵔⵏ ⵏ ⵜⵉⵔⵎⵉⵜ ⵏ ⵓⵎⵙⴰⵕⴰⴹ ⵙ ⵜⵉⴳⴳⵓⴳⵜ ⴷ ⵜⵉⵕⵡⵉ ⵏⵏⵙ ⵉ ⵓⵍⵜⴰⵖ ⵖ ⵓⵙⵏⴼⴰⵔ ⵢⵓⵎⴰⵏ, ⵓⵔ ⴷ ⵖⴰⵙ ⵎⴰ ⴷ ⵉⵥⵍⵉⵏ ⵙ ⵓⵣⵣⵔⴰⵢ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⵓⵖⵔⵉⵎⵜ ⴷ ⵜⵏⴱⴽⴰⴹⵜ, ⵍⵍⵉⵖ ⵉⴳⴰ ⵓⵣⵣⵔⴰⴼ ⵢⴰⵏ ⵉⵎⵉⵙⵙ ⵏ ⵓⵣⵣⴳⵉⵔ ⵏ ⵢⴰⵏ ⵓⵙⵎⴰⵇⵇⵍ ⵉⵛⵛⴰⵔⵏ, ⵖⵉⴽ ⴰⵏⵏ ⵓⵍ ⴷ ⵜⵡⵓⵔⵉ ⴼ ⵢⴰⵏ ⵓⵖⴰⵡⴰⵙ ⵏ ⵓⵙⵡⴰⵍⴰ ⵍⵍⵉ ⵔⴰⴷ ⵢⴰⵡⵙ ⵖ ⵓⵎⵎⴰⵜⵉ ⵏ ⵡⴰⵏⴰⵡ ⵏ ⵜⵎⵙⵙⵓⴳⵓⵔⵜ ⵜⴰⵣⵔⴼⴰⵏⵜ ⴷ ⵜⵣⵔⴼⵜ ⵙ ⵡⴰⵏⴰⵡ ⵉⵙⵡⵓⵔⵉⵏ ⵙ ⵜⴻⵜⵉⵇⵏⵉⵢⵉⵏ ⵏ ⵓⵎⵢⴰⵡⴰⴹ ⵙ ⵜⵉⴳⴳⵓⴳⵜ ⴷ ⵜⵖⵉⵙⵜ ⵜⴰⵎⵃⵔⴳⴰⵏⵜ ⵖ ⴽⵓ ⵜⵉⴼⵔⴽⵉⵡⵉⵏ ⵏ ⵜⵏⴰⴼⵓⵜ ⵜⴰⵣⵔⴼⴰⵏⵜ.

ⵉⵎⵍⴰ ⴷ ⵓⵎⴰⵡⵙⴰⵙ ⵏ ⵜⵣⵔⴼⵜ ⵜⴰⵢⴰⴼⵓⵜ ⵏ ⵜⵎⵓⵟⵟⵓⵏⵜ ⵖ ⵜⵡⵓⵔⵉ ⵏ ⵜⵙⵏⴱⴹⴰⵢⵉⵏ ⵏ ⵜⴳⵍⴷⵉⵜ ⵙⴳ ⵜⵣⵡⵉⵔⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵙⴳ 20 ⵎⴰⵕⵚ 2020 ⴰⵔ 1 ⵢⵓⵏⵢⵓ 2020. ⵖ ⵓⵙⵡⵓⴷⴷⵓ ⵏ ⵜⵡⵓⵔⵉ ⵍⵍⵉⵖ ⵉⵍⵍⴰ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵙⵎⵏⵉⴷ ⵎⴰⵙⵙ ⴰⵎⴰⵡⴰⵙⴰⵙ ⵜⴰⵢⴰⴼⵓⵜ ⵉⵀⵎⵎⴰⵏ ⵉⵙⵏⵎⴽⵜⴰⵜⵏ ⵉⵍⵓⵊⵉⵙⵜⵉⵢⵏ  ⵖ ⵓⵎⵏⵉⴷ ⵏ ⵓⵙⵉⵣⴷⴳ ⵏ ⵉⵙⴰⵢⵔⵓⵔⵏ ⴷ ⵜⵏⵓⴼⴰ ⵏ ⵜⵓⵚⴽⵉⵡⵉⵏ ⵏ ⵜⵙⵏⴱⴹⴰⵢⵉⵏ.

ⴱⴷⵔⵏ ⵉⴳⵎⵎⴰⵏ ⵏ ⵜⵙⵇⵇⵉⵎⵜ ⵍⵍⵉ ⵃⴰⴹⵕⵏⵉⵏ, ⵖ ⵜⵎⵔⴰⵔⵓⵜ ⵏⵏⵙⵏ ⴼ ⵜⴽⵛⵛⵓⵎⵜ ⵏ ⵓⵎⴰⵡⵙⴰⵙ, ⴽⵔⴰ ⵏ ⵜⵏⵇⴰⴷ ⵥⵍⵉⵏⵉⵏ ⵙ ⵓⵙⵡⵓⴷⴷⵓ ⵏ ⵜⴼⵔⴽⴰ ⴰⴷ ⴰⵎ ⵜⵉⵎⵙⵓⵜⴰⵍ ⵏⵜⵣⵣⵉⴳⵣⵜ ⵏ ⵜⵡⵓⵔⵉ ⵖ ⵜⵙⵏⴱⴹⴰⵢⵉⵏ ⵜⵉⵎⵣⵡⵓⵔⴰ ⴷ ⵜⵙⵏⴱⴹⴰⵢⵉⵏ ⵏ ⵡⴰⵍⴰⵙ ⴷ ⵓⵎⵙⴰⵙⴰ ⵏⴳⵔ ⵜⴰⵎⵢⴰⴳⴳⵓⴳⵜ ⵜⴰⵏⴰⵎⵓⵏⵜ ⴷ ⵓⵙⵓⵊⴷ ⵏ ⵜⵏⵓⴼⴰ ⵜⵉⵣⵔⴼⴰⵏⵉⵏ, ⴷ ⵓⵙⴽⵔ ⵙ ⵓⵏⴳⵔⴰⵡ ⵏ ⵓⵎⴷⴰⵡⴰⵍ  ⴰⵔⴽⵎⴰⵎ ⵖ ⵜⵉⴼⴰⵡⵜ ⵏ ⵓⵙⵎⴰⵢⵏⵓ ⵏ ⵜⵏⵓⴼⴰ ⵙ ⵜⵉⴳⴳⵓⴳⵜ, ⴷ ⵉⴷⵔⵉⵣⵏ ⵉⵣⵣⵔⴰⴼⵏ ⴷ ⵉⵎⵏⴰⴷⵏ ⵉⴷⵙⵜⴰⵔⵏ ⵏ ⵓⵙⴱⴷⴷⵉ ⵏ ⵉⵙⴰⵕⴰⴹⵏ. ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵉ ⵓⵙⵖⵓⴷⵓ ⵏ ⵜⴻⵜⵉⵇⵏⵉⵜ ⵏ ⵓⴼⵉⵣⵢⵓⴽⵓⵏⴼⵉⵕⵓⵏⵚ ⵃⵎⴰ ⴰⴷ ⵢⵉⵍⵉ ⵓⵣⵔⴰⵢ ⵏ ⵜⵎⵓⴽⵔⵉⵙⵉⵏ ⵍⵍⴰⵏⵉⵏ ⴷ ⵓⵙⵏⵎⴰⵍⴰ ⵉⵕⵡⴰⵏ ⵏ ⵉⵙⴷⴰⵡⵏ ⵍⵍⴰⵏⵉⵏ ⵙ ⵜⵖⴰⵔⴰⵙⵜ ⵉⴹⵎⵏⵏ ⵜⵉⵕⵡⵉ ⵏ ⵜⵏⴰⴼⵓⵜ ⵏ ⵜⵣⵔⴼⵜ ⵖ ⵜⵎⵙⴽⴰⵔ ⵏ ⵜⵎⵢⴰⴳⴳⵓⴳⵜ ⵜⴰⵏⴰⵎⵓⵏⵜ.

ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⵓⴳⴳⴰⵙ ⵏ ⵓⵡⴰⵏⴽ ⵉ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵍⵍⵉⵖ ⵉⵏⵊⵎ ⵍⵎⵖⵔⵉⴱ ⵖ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ.

ⵖⵎⴽ ⵍⵍⵉ ⵙⴷⴷⵉⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵏ ⵜⵎⵜⵜⵉ ⴼ ⵓⵣⵓⵛⵛⵍ ⵏ ⵓⵙⵖⵔⵜ ⵏ ⵜⵙⴰⵡⵔⵜ ⵏ ⵓⵙⵏⴼⵍ ⴰⵎⵓⵟⵟⵓⵏ ⵏ ⵓⵏⴳⵔⴰⵡ ⵏ ⵜⵣⵔⴼⵜ ⵃⵎⴰ ⴰⴷ ⵢⴰⵎⵓ ⴽⵓ ⵜⵉⵎⵙⴽⴰⵔ ⵜⵉⵎⵙⵙⵓⴳⵓⵔⵉⵏ ⵏ ⵜⴼⴰⵜⵉⵜ ⵏ ⵜⵣⵣⵉⴳⵣⵜ ⴷ ⵜⵉⵕⵡⵉ ⴷ ⵓⵃⵟⵟⵓ ⵏ ⵉⵏⵙⴷⴰⵔⵏ ⴷ ⵉⵣⵔⴼⴰⵏ ⵍⵍⴰⵏⵉⵏ ⵖ ⵓⴷⵓⵙⵜⵓⵔ.

ⵖⵎⴽ ⵍⵍⵉ ⵜⵍⵍⴰ ⵜⵖⵔⵉ ⵉ ⵡⴰⵣⵣⴰⵣ ⵏ ⵜⵙⴰⵡⵔⵉⵏ ⵜⵉⵣⵣⵔⴰⴼⵉⵏ ⴰⵎ ⴰⵙⵏⴼⴰⵔ ⵏ ⵓⵏⴳⵔⴰⵡ ⴰⵣⵔⴼⴰⵏ ⴷ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴰⵎ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 10.16 ⵉⵥⵍⵉⵏ ⵙ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵏⴱⴽⴰⴹ.

ⵙ ⵓⵣⵎⵎⵣⵓ ⴰⴷ, ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵜⴰⵖⵜⴰⵙⵜ ⵏ ⵓⵙⵓⵔⴼ ⴰⴳⵍⴷⴰⵏ ⴼ ⵎⵏⵏⴰⵡ ⵉⵏⴽⵔⴰⴼⵏ, ⵉⴳⴰ ⵎⴰ ⵏⵏ ⵜⴰⴱⵔⴰⵜ ⵉ ⵓⵏⴳⵔⴰⵡ ⵏ ⵓⵣⵔⴼ ⵉ ⵓⵣⵣⵔⴰⵢ ⵏ ⵜⵓⵜⵔⵉⵡⵉⵏ ⵏ ⵜⵎⵙⴰⵔ ⵏ ⵓⵏⵏⵓⵕⵥⵎ ⴰⵎⵙⵉⴽⵓⴷ ⵖⵎⴽ ⴰⵏⵏ ⴷ ⵓⵙⵉⴱⵙⵓⵙ ⵏ ⵓⴽⵔⴰⴼ ⴰⵎⵙⵉⴽⵓⴷ, ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⵉⴱⵙⵓⵙ ⴼ ⵉⵖⵣⵓⵜⵏ.