ⵜⵉⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⵖ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 22 ⵛⵓⵜⴰⵏⴱⵉⵔ 2020 ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵜⴰⵡⴼⵉⵇ ⵍⵎⵉⵎⵓⵏⵉ ⵙ ⵜⵉⵍⵉⵜ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ, ⵉ ⵓⴹⴼⵕ ⵏ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 46.19 ⵉⵣⴷⵉⵏ ⴷ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵉⵙⵔⵙ ⵓⵙⵏⴼⴰⵔ ⵜⵉⵙⵎⵉⴳⴰⵍ ⵏ ⵓⵏⴳⵎⴰⵎ ⴰⴷ ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵎⵏⵏⵉ 36 ⵏ ⵓⴷⵓⵙⵜⵓⵔ, ⴷ ⵜⵎⴰⵎⴽⵉⵏ ⵏ ⵓⵙⵏⴰⵢ ⵏⵏⵙ ⴷ ⵓⵙⵏⵎⴰⵍⴰ ⵏⵏⵙ ⴷ ⵉⵍⵓⴳⵏⵏ ⵏ ⵓⵙⵡⵓⵔⵉ ⵏⵏⵙ ⴷ ⵡⴰⴷⴷⴰⴷⵏ ⵏ ⵓⵎⵣⴰⵔⴰⵢ.

ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵖ ⵓⵎⵏⴰⴹ ⴰⴷ ⵎⴰⵙ ⴷ “ⴰⵙⴰⵜⵉ ⵉⵣⴷⵉⵏ ⴷ ⵉⵔⵎⵎⵓⵙⵏ ⴷ ⵉⵣⵣⵔⴰⴼⵏ ⵏ ⵓⵏⴳⵎⴰⵎ ⴰⴷ ⵍⵍⴰⵏ ⵖ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵜⵙⵖⵣⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵜⵉⵍⵉ ⵓⵍⴰ ⵜⵙⵉⵎⴰⵏⵜ ⴷⴰⵔ ⵓⵏⴳⵎⴰⵎ ⴰⴷ, ⴰⵢⵍⵍⵉ ⴼ ⵓⵔ ⵉⵍⵍⵉ ⵓⵎⵣⴰⵔⴰⵢ ⵏⴳⵔ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⵙ ⴰⵢⵍⵍⵉ ⵉⴼⴰⵡⵏ ⵖ ⵓⵎⵏⵏⵉ 159 ⵏ ⵓⴷⵓⵙⵜⵓⵔ ⵍⵍⵉ ⵉⵙⴰⵡⵍⵏ ⴼ ⵜⵙⵉⵎⴰⵏⵜ ⵏ ⵜⴳⵔⴰⵡⵉⵏ ⵏ ⵓⵏⴱⴰⴹ”.

ⵖⵎⴽ ⵍⵍⵉ ⵉⵙⵉⵙⴼⵉⵡ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ “ⵉⴳⵔ ⵏ ⵜⵡⵓⵔⵉ ⵏ ⵓⵏⴳⵎⴰⵎ ⴰⴷ ⴰⵔ ⵉⵎⵎⴰⵍ ⴰⵢⵍⵍⵉ ⴼ ⵉⵎⵎⴰⴳⴳⴰⵔ ⴷ ⵜⴳⵔⴰⵡⵉⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⵢⴰⴹⵏⵉⵏ, ⵍⵍⵉⵖ ⵔⴰⴷ ⵉⴽⵛⵎ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⵙ ⵓⵏⴳⵔⴰⵡ ⵍⵍⵉ ⵔⴰⴷ ⵉⵙⵙⵕⵚⵓ ⵉⵎⴰⵙⵙⵏ ⵏ ⵓⵏⴱⴰⴹ ⴷ ⵜⵎⴰⴼⴰⵡⵜ”.

ⵢⵉⵏⵉ ⵎⴰⵙⵙ ⴱⵏ ⵛⴰⵄⴱⵓⵏ ⵎⴰⵙ ⴷ “ⵢⵓⵛⴽⴰ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵏⴳⵎⴰⵎ ⵏ ⵜⵣⴷⴳⵉ ⴷⴼⴼⵉⵔ ⵏ 18 ⵏ ⵡⴰⵢⵢⵓⵔ ⵏ ⵓⵎⴹⴰⴽⴰⵕ ⴷ ⴽⵓ ⵉⴳⵔⴰⵏ ⵓⵏⴱⵉⴹⵏ ⴷ ⵜⴳⵔⴰⵡⵉⵏ ⵜⵉⵎⴰⵜⴰⵢⵉⵏ ⵖ ⵜⵍⵍⴰ ⵜⵏⴱⴰⴹⵜ ⵜⴰⵣⵔⴼⴰⵏⵜ ⴷ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⵜⴳ ⵜⵓⵏⵖⵉⵍⵜ ⵉⵜⵜⵓⵖⵔⴰⵏ ⵜⴰⴷ ⴼ ⵉⵍⵍⴰ ⵓⵎⵛⴰⵛⴽⴰ”.

ⵖ ⵓⵎⴹⴰⴽⴰⵕ, ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴰⴷ ⵜⵜⵓⴱⴷⵉⵔ ⵜⵙⵉⵎⴰⵏⵜ ⵏ ⵓⵏⴳⵎⴰⵎ ⴰⴷ ⵙ ⵜⵖⴰⵔⴰⵙⵜ ⵉⴼⴰⵡⵏ, ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵎⵏⵏⵉ 159 ⵏ ⵓⴷⵓⵙⵜⵓⵔ.

ⵖⵎⴽ ⵍⵍⵉ ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵃⵎⴰ ⴰⴷ ⵢⵉⵍⵉ ⵓⵙⵏⴼⵍ ⵏ ⵓⴹⵕⵉⵚ ⵙⵍⴰⵡⴰⵏ ⴰⴽⴽⵯ ⵎⴰ ⴷ ⵉⵥⵍⵉⵏ ⴷ ⵓⵙⵏⴰⵢ ⵏ ⵓⵏⴳⵎⴰⵎ ⴷ ⵜⴱⵔⵉⴷⵉⵏ ⵏ ⵜⵡⵓⵔⵉ ⵏⵏⵙ ⴷ ⵜⵣⴷⴰⵢⵉⵏ ⵏⵏⵙ ⴷ ⵜⵏⴱⴰⴹⵜ ⵜⴰⵣⵔⴼⴰⵏⵜ ⵖⵎⴽ ⴰⵏⵏ ⴷ ⵓⴱⵕⵍⴰⵎⴰⵏ.